Shugaba Buhari ya bukaci majalisa ta tabbatar da sunayen da ya aike mata

Shugaban kasa Muhammadu Buhari, ya bukaci majalisar dattawa da ta tabbatar da nadin mutane 12 da aka zaba a matsayin mambobin kwamitin gudanarwa na hukumar raya yankin arewa maso gabashin kasar nan wato NEDC.

A wata sanarwa da mai magana da yawun shugaban kasar Malam Garba Shehu, ya fitar jiya Juma’a a Abuja, yace ‘bukatar shugaban kasar na kunshe ne a cikin wata wasika da ya aikewa shugaban majalisar dattawa, Ahmed Lawan mai kwanan watan 3 ga watan nan da muke ciki’.

“Wadanda aka nada sun hada da: Bashir Bukar Baale, Shugaban da Suwaiba Idris Baba, da Musa Yashi, da Dakta Ismaila Maksha da Umar Hashidu”.

“Sauran sun hada da Mustapha Ahmed Ibrahim da Hadiza Maina da Grema Ali da Onyeka Bishara-Tony da Uwargida Hailmary Ogolo Aipoh, da kuma Air Commodore Babatunde Akanbi mai ritaya”.

Rahoton: Abdulkadir Haladu Kiyawa