Mun sauya sunan kwamitin kar-ta-kwana mai yaki da corona – Boss Mustapha

Gwamnatin tarayya ta amince da sauya sunan kwamitin karta kwana dake yaki da cutar Covid 19 zuwa kwamitin da zai rika bibiya akan al’amuran da suka shafi cutar ta Corona.

Sakataren Gwamnatin tarayya kuma shugaban kwamitin Boss Gida Mustapha ne ya bayyana haka lokacin da yake zantawa da manema labarai.

Wannan na zuwa ne bayan da aka cika shekara guda da barkewar cutar ta Corona a fadin kasar nan.

A Cewar Boss Mustapha Gwamnatin tarayya ta amince ya cigaba da Jagorantar Kwamitin daga nan zuwa karshen shekarar da muke ciki.

Boss Mustapha ya ce kwamitin zai sanya idanu ne kan dakile cutar a fadin kasar nan tare da daukar matakan kariya domin kawo karshen cutar.