Nasarar Abba Kabir a Kotu ba kuskure bane: Farfesa Odinkalu

Farfesa a fannin shari’a Chidi Odinkalu, ya ce kundin shari’ar kotun ɗaukaka ƙara da ke tabbatar da nasarar Gwamnan Kano, Abba Kabir Yusuf ba kuskuren rubutu ba ne.

Da yake tsokaci kan taƙaddamar hukuncin kotun, Farfesa Odinaku, tsohon Shugaban Hukumar Kare Hakkin Dan Adam na Najeriya ya bayyawa wa gidan talabijin na Channels cewa, ko kaɗan ba za a kira abin da ke cikin kundin shari’ar kuskuren rubutun alkalan kotun ba.
“Wannan ba kuskuren rubutu ba ne. Wannan tsohon zance ne. Babu kotun da ta san abin da take yi da za ta fitar da irin wannan hukunci har ta sanya hannu a kai.

“Sai dai watakila a kotun gargajiya, ba ma kotun yanki ba, ballantana babbar kotu”.