NCDC : Sabbin masu dauke da cutar Korona sun kai 437

Cibiyar dakile yaduwar cututka ta kasa NCDC ta sanar da karin sabbin mutane 437 da suka kamu da Annobar cutar COVID-19 a jiya Lahadi.

A sanarwar da cibiyar ta wallafa a shafinta na Twitter ta ce yanzu haka adadin mutanen da suka kamu da cutar a Najeriya ya kai 46, 577, inda aka sallami 33, 186 daga cikin su bayan tabbatar da sakamakon gwajin da aka yi musu cewar sun warke.

Ya zuwa yanzu dai cibiyar ta NCDC ta ce mutane 945 ne suka mutu a sanadiyyar cutar ta COVID-19.

Cibiyar ta bayyana cewa jihohi 17 ne cikin tarayyar kasar nan aka samu karin masu dauke da cutar.

Anan jihar Kano kididdigar gwajin cutar a jiya Lahadi na nuni da cewa, an samu karin mutane 4 da suka kamu da cutar, wanda ya zamana adadin mutanen da suka kamu da cutar ya kai 1, 626.

Rahotanni na nuni da cewa, mutane 1, 308 ne aka sallama bayan gwajin da aka yi musu ya tabbatar da basa dauke da cutar, inda kuma mutane 54 suka mutu a sakamakon cutar ta COVID-19 a fadin jihar Kano.