NiMet ta yi hasashen samun ruwan sama hade da tsawa a wasu jihohin arewacin kasar nan

Hukumar kula da yanayi ta kasa NiMet ta yi hasashen cewa za a samu ruwan sama mai hade da tsawa a wasu jihohin arewacin kasar nan tun daga yau Asabar zuwa ranar Litinin, tare da yiwuwar iska mai karfi a wasu yankuna.

Hukumar ta bayyana hakan ne cikin wata sanarwar da ta fitar, inda ta ce ana sa ran ruwan saman zai shafi jihohi da dama da suka hadar da Taraba, Adamawa, Kaduna, Borno, Bauchi, Gombe, Jigawa, Katsina, Kano, Zamfara, Sokoto, Kebbi da Yobe a lokuta daban-daban cikin kwanaki ukun.

NiMet ta yi gargadin cewa tsawa da iska mai ƙarfi na iya haddasa haɗari, don haka ta shawarci jama’a da su guji shiga ko tuka mota cikin yanayin na ruwan sama, kana su guji fakewa ƙarƙashin manyan bishiyoyi.

Hukumar ta kuma bukaci kamfanonin jiragen sama da sauran masu ruwa da tsaki su rika bibiyar rahotannin yanayi kafin gudanar da ayyukansu domin kare rayuka da dukiyoyin al’umma.