Obi da Kwankwaso sun nemi a yi adalci kan kisan Danshagamu a Kano

Peter Obi da Sanata Rabiu Musa Kwankwaso sun yi Allah-wadai da kisan mai sharhi kan harkokin siyasa a Kano, Ibrahim Khalil Danshagamu, tare da neman a hukunta waɗanda suka aikata laifin.

A saƙonnin ta’aziyyarsu daban-daban, jagororin siyasar sun buƙaci gwamnatin Kano da hukumomin tsaro su gudanar da cikakken bincike kan lamarin.

Danshagamu ya rasu bayan an kai masa hari da makami mai kaifi a gidansa da ke unguwar Gaida, Ƙaramar Hukumar Kumbotso. Rundunar ’yan sandan Kano ta ce ta kama mutum biyu da ake zargi da hannu a kisan.

Peter Obi ya ce bambancin ra’ayi ko suka ba zai taɓa zama hujjar amfani da tashin hankali ba, yana mai jaddada muhimmancin kare ’yancin faɗar albarkacin baki.