QATAR 2022 QUALIFIERS: Super Eagles za ta karbi rahoto kan lafiyar Samuel Kalu

Mai horar da kungiyar kwallon kafa ta Najeriya, Gernot Rohr ya ce tawagar likitocin ‘yan wasan kasar nan za su karbi rahoton likitan Samuel Kalu daga Bordeaux.

Rohr ya ce, Super Eagles na bukatar rahoton don sanya ido kan yanayin lafiyar dan wasan yayin da wasanni neman tikitin gasar cin kofin duniya ta 2022 ke karatowa.

Ya kuma ce ya na ci gaba da bibiyar lafiyar Kalu tun da ya dawo bayan da ya fadi a lokacin wasan manyan rukunin kungiyoyin kwallon kafa na kasar Faransa a karshen makon jiya.

A cewar kungiyar likitocin ta Faransa, dan wasan ya sha fama da rashin isasshen ruwa a jikin sa a maimakon matsalolin zuciya kamar yadda aka yi fargaba da farko.

“Likita daga Bordeaux zai aike da dukkan gwaje-gwaje da sakamako ga likitan mu Ibrahim,” in ji Rohr.