Rundunar Soji ta fara aiki da sabbin bataliyoyin dakarunta uku a Zamfara

Rundunar Sojin kasar nan, ta fara aiki da sabbin bataliyoyin dakarunta uku a Jihar Zamfara, a wani ɓangare na ƙoƙarin ƙarfafa ayyukan tsaro da inganta mayar da martani cikin gaggawa.

A cikin wata sanarwa da Mukaddashin Mataimakin Daraktan Hulɗa da Jama’a na rundunar Sojin a Birged ta 1 da ke Gusau, ya fitar a shafin X, ta ce, sabbin bataliyoyin da aka fara aiki da su, su ne Bataliyar Sojojin Ƙasa ta 12 da ke Bakura, da Bataliyar Sojojin Ƙasa ta 23 da ke Kaura Namoda, da Bataliyar Sojojin Ƙasa ta 28 da ke Anka.

Ana sa ran bataliyoyin za su faɗaɗa ayyukan rundunar sojin a wuraren da suke gudanar da ayyukansu, tare da tabbatar da tsaron yankunan da aka ɗora musu alhakin kula da su.