Rundunar ‘yan sandan Kano ta gayyaci Ali Madakin Gini

Rundunar ‘yan sandan a Jihar Kano ta gayyaci zababben dan majalisar wakilai na karamar hukumar Dala a jam’iyyar NNPP Ali Madakin Gini domin amsa wasu tambayoyi.

Ta cikin sanarwar da mai magana da yawun rundunar ‘yan sandan na Jihar Kano SP Abdullahi Haruna Kiyawa ya fitar a daren jiya Laraba, yace sun gayyaci dan majalisar ne sakamakon zargin mallakar bindiga ba bisa ka’ida ba.

Wakilin mu Abdulkarim Muhammad Tukuntawa ya ruwaito cewa ana zargin Madakin Gini ya fito da wata bindiga lokacin da ake zargin wasu gun-gun matasa sun kaiwa tawagarsa hari yayin da suke kan hanyarsu ta tarar Sanata Kwankwaso lokacin da yazo Kano domin yakin neman zabe.

Rahoton: Abdulkarim Muhammad Tukuntawa