Yan sanda sun kama matasa 49 bisa zargin satar kaya a Triumph

Rundunar ‘yan sandan jihar Kano ta ce, ta fara gudanarda bincike a kan wasu matasa 49 da ta cafke  bisa zargin hada kai da satar kayan mutane a shagunan tsohuwar madaba’ar Triumph da ke karamar hukumar Fagge.

Rundunar ta bayyana hakan ne ta cikin wata sanarwa da mai magana da yawun ta SP Abdullahi Haruna Kiyawa ya fitar.

Kiyawa ya ce, rundunar ta kama matasan ne da kayayyakin sata da suka hada da na’urar sanyaya daki guda 4, Kofofi da Tagogi da sauran wasu kayayyaki.

Haruna Kiyawa ya kuma ce, yanzu haka kwamishinan ‘yan sandan Kano Muhammad Hussain Gumel ya bada umarnin ci gaba da binciken matasan domin gurfanar da su a gaban Kotu.

Sanarwar ta kuma ruwaito cewa, Kwamishinan ƴan sandan na Kano, ya kuma yi kira ga iyayen yara da kuma masu fada a ji a unguwanni da su rika gargadin matasa wajen kaucewa satar kayan mutane, domin duk wanda suka kama ba zasu kyaleshi ba.

Rahoton: Abdulkarim Muhammad Tukuntawa