Rundunar yan sandan Kano ta sanya dokar takaita zirga-zirga daga 12:00 na daren Juma’a

Rundundar ‘yan sandan jihar Kano, ta sanya dokar takaita zirga-zirgar jama’a da ababen hawa daga karfe 12:00 na daren yau juma’a 17 ga watan Maris.

Hakan na cikin wata sanarwa da Kwamishinan ‘yan sandan Kano Muhammad Hussain Gumel ya fitar a wani bangare na shirye-shiryen gudanar da zaben gwamna a gobe.

A cewar sanarwar, yanzu haka rundunar ta kammala duk wani shirinta domin tabbatar da tsaro a yayin zaben gwamna, ta hanyar hada kai da sauaran takwarorinta na tsaro don tabbatar da zaman lafiya.

Ya kuma ce, a yayin zaben an haramta sanya duk wata alamar jam’iyyar siyasa a wajen zabe, sannan an haramta wa kungiyar yan sintiri ta Vigilante da jami’an hukumar KAROTA shiga harkokin zabe a fadin jihar Kano.

Muhammad Gumel ya yi kira ga Al’ummar jihar Kano da su gaggauta bayar da rahoton duk wani motsi da ba su gamsu da shi ba.