Satar Dalibai: Ganduje ya sake rufe wasu makarantun kwana.

Gwamnatin jihar Kano ta bada umarnin rufe makarantun Tsangayu na kwana da ke fadin jihar.

A cewar gwamnatin, daukar wannan matakin na rufe makarantun Tsangayun na kwana yana alaka ne da sace ‘yan makarantar mata ta Jangebe da ke jihar Zamfara wadanda aka sako su a yau talata da kuma dalibai da aka sace a karamar hukumar Kagara da ke jihar Niger.

A cikin wata sanarwa mai dauke da sa hannun shugaban hukumar kula da makarantun Tsangayu na jihar Kano Gwani Yahuza Gwani Dan Zarga, ta ruwaito gwamnan na Kano na cewa, a baya-bayan nan gwamnati ta rufe makarantun kwana guda goma sha biyu a matsayin wani mataki na kare lafiyar dalibai.

“Gwamnati tana umartar iyayen yara da su gaggauta zuwa su kwaso ‘ya’yansu daga makarantun Tsangayar ba tare da bata lokaci ba” A cewar Gwamna Ganduje.