Shekarau zai fitar da ‘yan kwallo zuwa kasashen waje

Tsohon gwamnan Kano kuma sanata mai wakiltar Kano ta tsakiya Malam Ibrahim Shekarau yayi alkawarin zai fitar da matasa ‘yan kwallo hazikai biyar, zuwa kungiyoyin kwallon kafa na ketare, daga kungiyarsa ta Shekarau Babes.

Shekarau ya bayyana hakan ne a daren Jumu’a yayin ganawarsa da jagororin kungiyar ta sa a birnin tarayya Abuja.

Hakan na kunshe ne cikin wata sanarwa da aka rabawa manema labarai mai dauke da sahannun kakakin jagororin kungiyar ta Shekarau Babes Ahmad Babandi Gama.

Sanatan ya tabbatar da cewar kungiyar za ta shiga a dama da ita a gasar rukuni na ‘daya wato Nigeria National League (NNL) na kakar wasa ta 2021/2022.