Shugaba Abdel Fattah al-Sisi ya bukaci a warware rikicin Habasha ta hanyar tattaunawa da Diflomasiyya

Shugaban ƙasar Masar, Abdel Fattah al-Sisi, ya yi kira da a warware rikicin ƙasar Habasha ta hanyar tattaunawa da diflomasiyya, maimakon amfani da ƙarfin soja.

Shugaba Al-Sisi ya bayyana hakan ne yayin wani taron ƙungiyar Tarayyar Afirka da aka gudanar a birnin El-Alamein na ƙasar Masar, inda ya yi gargaɗin cewa rikicin na iya yaɗuwa zuwa ƙasashen da ke maƙwabtaka da Habasha, matuƙar ba a ɗauki matakan shawo kansa ba.

Shugaban na Masar ya kuma gana da takwarorinsa na Eritrea, Somaliya da Sudan, inda suka tattauna kan hanyoyin da za a bi domin dakile yaɗuwar rikicin, musamman a yankunan da ke kan iyakokinsu da Habasha.

A jawabinsa, Abdel Fattah al-Sisi ya yi Allah-wadai da abin da ya kira katsalandan ɗin ƙasashen waje a harkokin cikin gida na ƙasashen Afirka, yana mai cewa ya kamata dangantaka tsakanin ƙasashen ta ginu bisa mutunta juna da fahimtar juna, ba barazana ko tsoma baki ba.