Shugaba Tinubu ya naɗa sabon shugaban hukumar JAMB

Shugaban kasa, Bola Ahmed Tinubu ya nada Farfesa Segun Aina a matsayin sabon shugaban hukumar shirya Jarabawar Shiga Manyan Makarantu ta JAMB.

Wannan na cikin wata  sanarwa da mai magana da yawun shugaban kasa, Mista Bayo Onanuga ya fitar yau  Alhamis.

Ta cikin sanarwar mista Bayo ya ce,  Farfesa Aina kwararre ne a fannin ilimin kwamfuta da fasahar gudanar da jarabawa, tare da gogewa a bangaren sauye-sauyen cibiyoyi da inganta ayyukan gwamnati ta hanyar amfani da fasaha.

Sanarwar ta kuma ce,  Aina, wanda zai cika shekaru 40 a watan Yuli, ya kuma karanci ilimin Kwamfuta a Jami’ar Kent da ke Birtaniya, sannan ya samu digirin na biyu a Jami’ar Loughborough a bangarorin Internet Computing, Haka kuma ya halarci shirin horas da shugabanci a Lagos Business School.