SNB ta sake zaɓar Farfesa Umar Pate a matsayin shugabanta na ƙasa

Ƙungiyar ma’aikatan kafafen yaɗa Labarai ta Najeriya watau SNB, ta sake zaɓar Farfesa Umar Pate a matsayin shugabanta na ƙasa, yayin da Alhaji Ado Saidu Warawa na nan Freedom Radio ya zama mataimakin shugaban ƙungiyar na shiyyar Arewa maso Yamma.

Haka kuma, an zaɓi Farida Abubakar, wadda ita ce mai kula da harkokin ƙungiyar ta SNB a jihar Kaduna, a matsayin ma’ajin kuɗin ƙungiyar ta ƙasa.

Farida Abubakar ita ce babbar daraktar sashen rediyo na Hukumar Yaɗa Labarai ta Jihar Kaduna KSMC.

An gudanar da zaɓen ne a yayin taron shekara-shekara na kungiyar karo na uku wanda aka gudanar a jihar Bauchi, tare da halartar mataimakin gwamnan jihar, Auwal Jatau, da shugaban ƙungiyar ‘yan jarida ta ƙasa, NUJ, Kwamared Alhassan Yahaya, da sauran masu ruwa da tsaki a harkar yaɗa labarai.