Sojoji sun kashe shugaban yan ta’adda tare da kwato bindigogin yaƙi a Katsina

Rundunar Sojojin Najeriya ta ce dakarun Operation FANSAN YAMMA sun kashe wani babban kwamandan ’yan ta’adda tare da kwato bindigogi da alburusai da babura a yayin wani samame a ƙaramar hukumar Matazu ta Jihar Katsina.

A cewar wata sanarwa da jami’in yaɗa labarai na Joint Task Force, Laftanar Kanal Aliyu Danja, ya fitar ranar Lahadi, sojojin sun gudanar da aikin ne a ranar 29 ga Agusta, 2026, inda suka yi arangama da ’yan ta’addan da suka yi musu tsayin daka kafin sojojin su tilasta musu tserewa.

Sojojin sun tabbatar da kashe wani ɗan ta’adda da aka bayyana da suna Smally, wanda aka ce Laftanar ne a ƙarƙashin fitaccen shugaban ’yan ta’adda Kachalla Muhammadu Filani.

Rundunar ta ce ta kuma kwato bindigogin mashin guda uku, AK-47 guda biyu, harsashi masu tarin yawa, da babura guda shida da ake zargin ’yan ta’addan ke amfani da su wajen gudanar da ayyukansu.

Rundunar ta ƙara da cewa aikin wani ɓangare ne na ci gaba da kai hare-hare domin matsa wa ƙungiyoyin ’yan ta’adda lamba tare da tarwatsa ƙarfin gudanar da ayyukansu a yankin.