Sojoji sun kashe ‘yan ta’adda 21 tare da jikkata wasu

Rundunar sojin kasar nan ta ce dakarunta sun lalata wani sansanin ’yan ta’adda a yankin Kopre, da ke Karamar Hukumar Hong a Jihar Adamawa.

Rundunar ta ce aikin, wanda aka fara tun ranar Laraba, ya biyo bayan samun bayanan sirri kan ayyukan ’yan ta’addan a yankin.

Ta ce dakarun Operation Hadin Kai sun kashe ’yan ta’adda sama da 21 tare da jikkata wasu a yayin arangama daban-daban.

Haka kuma, sojojin sun lalata wasu muhimman kayayyakin ’yan ta’addan, ciki har da bindigar AK-47.

Mai magana da yawun rundunar hadin gwiwa ta Arewa maso Gabas, Kyaftin Mohammed Goni, ya ce hare-haren na daga cikin kokarin ceto mutanen da aka yi garkuwa da su a Mussa da Lassa.

Ya ce dakarun za su ci gaba da matsa lamba har sai an gano inda aka boye mutanen da aka sace tare da kubutar da su.