Tsaro: ba ni da alaka da wata kungiyar ta’addanci – Janar Abdussalami Abubakar

Tsohon shugaban mulkin soji na kasar nan Janar abdussalami Abubakar mai ritaya ya musanta zargin cewa yana da alaka da wasu kungiyoyin ‘yan bindiga da wasu ‘yan tadda da ke aikata ta’addanci a jihar Niger.

Tsohon shugaban mulkin sojin na Najeriya ya bayyana labarin a matsayin na kanzon kurege da aka shirya don bata masa suna.

A cikin wata sanarwa da tsohon shugaban kasar ya fitar  mai dauke da sa hannun mai magana da yawunsa, Dr. Yakubu Suleiman, ta ce, labarin da wasu kafafen yada labarai su ka yi da ke cewa an kama wani jirgin shalkwabta da ke rarraba abinci da makamai ga ‘yan bindiga a jihar ba gaskiya bane.

Sanarwar ta ce labarin ba gaskiya bane kuma tsohon shugaban kasar ba shi da alaka da wata kungiya ta ta’addanci.