Tsoron rasa aiki ne ke hana jami’an gwamnati bai wa shugabannin siyasa shawarwarin gaskiya- Boss Mustapha

Tsohon Sakataren Gwamnatin Tarayya, Boss Mustapha, ya yi gargaɗin cewa tsoron rasa aiki ko lalacewar makomar ma’aikata na iya hana jami’an gwamnati ba shugabannin siyasa shawarwarin gaskiya, lamarin da ka iya jefa shugabanni cikin manyan kura-kurai.

Mustapha ya ce jami’an da ke tsoron cewa faɗin gaskiya zai kawo musu cikas a aikinsu, za su iya zaɓar faɗin abin da shugabanni ke son ji, maimakon ba su shawarwarin ƙwararru da za su taimaka wajen tafiyar da gwamnati yadda ya kamata.

Ya bayyana hakan ne a Abuja, yayin gabatar da jawabin buɗe taron ƙungiyar tsofaffin manyan sakatarorin gwamnatin tarayya da shugabannin ma’aikatan gwamnati na shekarar dubu biyu da ashirin da shida, mai taken rawar da ma’aikatan gwamnati ke takawa wajen tafiyar da mulki.

Tsohon sakataren, wanda ya riƙe muƙamin daga shekarar 2017 zuwa 2023 ya ce ƙarfin ma’aikatan gwamnati yana cikin iya ba da shawarwari na gaskiya, aiwatar da hukuncin da ya dace da doka da kuma bayyana sakamakon ayyukansu cikin gaskiya.