Yajin aiki: NARD Ku zo teburin sulhu don tattaunawa – Karamin ministan lafiya

Gwamnatin tarayya ta bukaci kungiyar likitoci masu neman kwarewa da su dawo teburin sulhu don tattaunawa.

Karamin ministan lafiya Dr. Olorunnimbe Mamora ne ya bayyana hakan, lokacin da yake zantawa da gidan talabijin na Channels.

Ya ce, “Gwamnatin tarayya ba ta farin ciki da matakin da suka dauka na tsunduma yajin aiki, domin kuwa babban aikin su shi ne tabbatar da an bai wa mutane kulawa ta bangaren lafiya don kare rayuwar su”.

Idan za a iya tunawa tun a ranar 2 ga watan Agustan da muke ciki ne kungiyar likitoci masu neman kwarewa suka tsunduma yajin aikin sai baba ta gani.

Sakamakon abinda suka zarga na rashin cika musu alkawuran su da gwamnatin ta yi.