‘Yan bindiga sun bude wa jerin gwanon motocin Sarkin Birnin Gwari wuta

‘Yan bindiga sun bude wuta kan jerin gwanon motocin mai martaba sarkin Birnin Gwari da ke jihar Kaduna Alhaji Zubairu Jubril Mai Gwari II

Rahotanni sun ce an kai hari kan kwambar motocin sarkin na Birnin Gwari ne akan hanyar Birnin Gwari zuwa Kaduna da yammacin jiya talata.

Jaridar Daily Trust ta ruwaito cewa, direbar sarkin na Birnin Gwari Umar Jubril ya tabbatar da faruwar lamarin, yana mai cewa, sarkin ba ya kusa da inda ‘yan bindigar su ka kai harin.

‘‘Yan bindigar sun turo reshen bishiya akan titin da nufin tare jerin gwanon motocin sarkin, wanda kuma da suka gaza tare mu ne, sai kawai su ka bude mana wuta’’.

‘‘Ba mu tsaya ba, sun yi kokarin samu na da bindiga, amma Allah ya kiyaye ni, alburushi ya wuce ta kai na’’ inji Umar Jibril.