Yan bindiga sun sake yin garkuwa da mutane a Kajuru

Wasu ‘yan bindiga da har yanzu ba a kai ga gano su ba, sun yi garkuwa da mutum fiye da Tamanin a garin Kajuru yayin wani sabon hari da suka kai.

Rahotonni sun bayyana cewa, bata garin sun kai harin ne a ranar Lahadi, inda suka fasa shaguna tare da sace kayan abinci da sauran muhimman kayayyaki.

Tuni dai mai magana da yawun rundunar ‘yan sandan jihar ta Kaduna Mansur Hassan ya tabbatar da sace mutanen amma bai bayyana adadin mutanen da aka sace din ba, ya na mai cewa rundunar za ta bayyana adadin wadanda aka sace din nan gaba kadan.