‘Yan Najeriya mazauna ketare 684 ne suka kamu da corona a kasashen waje – BOSS

Gwamnatin tarayya ta ce kimanin ‘yan kasar nan 684 ne suka kamu da cutar corona a kasashen waje, yayin da dubu 13, 844 basa dauke da cutar, cikin adadin ‘yan kasar nan da aka dawo da su guda dubu 14, 906 wadanda suka makale a kasashen ketare sakamakon annobar corona.

Shugaban kwamitin yaki da cutar na gwamnatin tarayya Boss Mustapha ne ya bayyana hakan, lokacin da yake bada rahoto ga kwamitin yaki da cutar a birnin tarayya Abuja.

Ya ce, kwamitin ya lura da yadda matasa a kasar nan suka bada gudunmawa wajen yaki da cutar, a don haka abin a yaba ne matuka.

Boss Mustapha ya kara da cewa, fargabar da ake na yaduwar annobar a tsakanin al’umma ya ragu, sakamakon gudunmawar da kungiyoyin matasa ke yi na fito da dabarun wayar da akan al’umma.

Ta cikin jawabin nasa, Boss Mustapha ya ce, a yanzu kasar nan ta dawo da ‘yan asali kasar mazauna ketare su dubu 14, 906 tun bayan bullar annobar corona, wanda ya kawo kaso 80 na matafyan matasa ne.