‘Yan Najeriya miliyan 30 sun yi rijistar fita daga kangin talauci – Buhari

Gwamnatin Tarayya ta ce ta yiwa ‘yan Nijeriya sama da miliyan 30 rajistar karkashin shirin nan na fitar da mutane miliyan 100 daga talauci a shekaru 10 masu zuwa.

Babban sakatare a ma’aikatar kula da jin kai da kare abkuwar ibtila’I da ci gaban al’umma Alhaji Bashir Alkali ya bayyana hakan yayin gudanar da wani taro a birnin tarayya Abuja.

Ya ce a karkashin shirin ma’aikatar ta samar da tsarin bada tallafi da hadin guiwar bankin Duniya don rage talauci farfado da tattalin arziki a Najeriya.

A cewar sa shirin zai fara ne daga matakin tarayya zuwa jihohi, har zuwa matakin kananan hukumomi, abin da ke nuna rukuni uku na gwamnatoci za su ci gajiyar sa.