Yan Sanda a Kano sun cafe yan daba yayin da suke tada rikici

Rundunar ‘yan sandan jihar Kano, ta ce, ta cafke wasu yan Daba da sanyin safiyar Talatar nan da muke ciki.

Rundunar ta cafke matasan su bakwai ne yayin da suke tsaka da fafata wani rikicin Daba
a tsakanin wasu bangarori guda biyu a kusa da kasuwar Rimi.

Mai magana da yawun rundunar SP Abdullahi Haruna Kiyawa ne ya bayyana hakan a daren ranar Talata.

Ya ce, bayan samun rahoton barkewar rikicin tsakanin bangarorin ‘yan Daban, kwamishinan ‘yan sanda Kano Muhammad Hussain Gumel, ya bada umarnin aika jami’an rundunar inda suka samu nasarar cafke wasu daga cikinsu.

Jami’in ya kara da cewa, rundunar ba za ta saurara wa duk wanda ya ke kokarin haddasa fitina ba a fadin jihar Kano.

Rahoton: Abdulkarim Muhammad Tukuntawa