Yan sanda sun kama mutane 4 bisa yunkurin kona ofishin INEC na Takai

Rundunar ƴan sandan jihar Kano ta ce, ta kama mutane huɗu da take zargi da yunkurin ƙona ofishin hukumar zaɓe a karamar hukumar Takai.

Mai magana da yawun rundunar ƴan sandan jihar SP Abdullahi Kiyawa, ne ya bayyana hakan a zantawarsa da manema labarai a jiya Lahadi.

Ya ce, ana zargin mutane huɗun da yunkurin ƙona ofishin hukumar ta INEC a daidai lokacin da ake sanar da sakamakon zaɓe.

Haka kuma DSP Abdullahi Haruna Kiyawa, ya kuma ce, rundunar ta kama wasu ƴan bangar siyasa da suka kai hari ofishin yakin neman zaɓe na jam’iyyar NNPP a karamar hukumar Tudun Wada, inda suka kashe mutum biyu.