Yanzu-yanzu: An kuɓutar da wasu cikin ɗaliban kwalejin Kaduna daga masu garkuwa

Biyar daga cikin dalibai 39 na kwalejin tarayya ta koyon ilimin tsirrai da gandun daji da masu garkuwa da mutane suka sace a Afaka sun shaki iskar ‘Yanci bayan shafe kwanaki 25 a hannunsu.

Kwamishinan tsaro da harkokin cikin gida Samuel Aruwan ne ya tabbatar da kubutar su ta cikin wata sanarwa da ya fitar a yammacin yau Litinin.

Aruwan ta cikin sanarwar ya ce, sojoji ne suka samu nasarar kubutar da daliban guda biyar daga hannun masu garkuwa da su da yammacin nan, bayan samun bayanan sirri na maboyar su.

A cewar sa, daliban yanzu haka suna sansanin sijoji don bincikar lafiyarsu, kafin a kai ga mika su zuwa iyalan su.