Yanzu-yanzu: Ganduje ya bada umarnin rufe makarantun Kano

Gwamnan Kano Abdullahi Umar Ganduje ya bada umarnin rufe makarantun jihar bakiɗaya.

Kwamishinan ilimi na jihar Sanusi Sa’idu Ƙiru ne ya sanar da hakan ga Freedom Radio.

Ƙiru ya yi kira ga iyayen yaran da ke makarantun kwana kan su gaggauta dawo da ƴaƴansu gida.

Sai dai kwamishinan bai bayyana dalilin rufe makarantun ba.

Amma wata majiya ta shaida wa Freedom Radio cewa an rufe makarantun ne saboda dalilan tsaro.

Hakan na zuwa ne kwanaki huɗu bayan da ƴan bindiga suka sace ɗaliban makarantar sakandire a Katsina.

Tuni dai jihar Zamfara ta rufe wasu makarantu a jihar, yayin da jihohin Kaduna da Jigawa suka rufe makarantu saboda sake ɓarkewar annobar Corona.