Za a rufe Katsina ba shiga ba fita daga Talata

Gwamnan jihar Katsina Aminu Bello Masari ya ce daga karfe 7 na safiyar Talata mai zuwa za a rufe kwaryar birnin Katsina ba shiga ba fita domin dakile yaduwar annobar Coronavirus.

Cikin jawabin da gwamnan yayi ya ce cutar na kara mamaya kuma a yanzu haka an samu mutane biyu masu dauke da cutar a birnin Katsina, a don haka ya zama tilas a rufe garin, kamar yadda aka rufe Daura da Dutsinma.

Gwamna Masari ya ce daga karfe 7 na safiyar Talata ba shiga ba fita, sai dai wuraren sayar da danyen abinci da shagunan sayar da magani.

Har ila yau, Masari ya umarcin al’ummar sauran kananan hukumomi 31 da suka zauna a kananan hukumomin su, amma babu maganar zirga-zirgar zuwa wata karamar hukumar.

Izuwa yanzu mutane 12 ne suka kamu da cutar Coronavirus a jihar Katsina.