Za a yi gwanjon Motar Diego Maradona

Rahotanni dake fitowa daga kasar Spain na cewa za a yi gwanjon Motar Kawa (Luxurious), ta marigayi tsohon gwarzon dan wasan kasar Argentina Diego Maradona.

Motar, wacce take kirar Porsche 911, marigayi Maradona ya yi amfani da ita ne a karshen kakar wasanninsa a nahiyar Turai, a shekarar 1992, lokacin da ya ke wasa a kungiyar kwallon kafa ta Seville.

“Tabbas Motar za ta yi daraja sosai fiye da kudin da aka saka na yin gwanjon ta”.

“Bugu da kari za ta dau hankalin mutane da dama ciki har da ‘yan Kwallo kasancewar ta ta dan wasa Maradona ” inji Gregory Tuytens, kwararre kan gwanjon motoci a kasar Belgium .

An saka motar a kasuwa, a tallan kafar Intanet (Online), a kan Kudi Euro dubu 240, 800, daga Larabar nan zuwa ranar 10 ga Maris.

Motar ta shafe shekaru 20, a hannun wanda ya mallake ta dan kasar Andalus (Spain), da yake tsibirin Majorca, kafin a sake sayar da ita ga ‘yan kasar Faransa.