Za ayi jana’izar tsohon shugaban kasar Chadi Idris Deby a yau juma’a

A yau juma’a ake sa ran za ayi jana’izar tsohon shugaban kasar Chadi marigayi Idriss Deby wanda ake zargin ‘yan bindiga sun kashe shi a baya-bayan nan.

Rahotanni sun ce shugaba Emmanuel Macron na Faransa da shugaban kula da harkokin ketare na kungiyar tarayyar turai, Josep Borrell suna daga cikin shugabannin duniya da za su halarci wajen jana’izar.

Bayanai sun ce janai’zar za ayi ta ne a dandalin La Place de la Nation da ke birnin Ndjamena.

A ranar talata da ta gabata ne sojojin kasar ta Chadi suka sanar da rasuwar shugaba Idriss Deby wanda suka ce ya rasa ransa ne sakamakon wani gumurzu da ‘yan tawaye.