Za mu fatattaki barayin waya a yankin mu – Bakin Bulo Network For Better Tomorrow

Kungiyar Bakin Bulo Network For Better Tomorrow ta ce ta shirya tsaf domin kare unguwar Bakin Bulo daga shigowar barayin waya da suka addabi Unguwar a ‘yan kwanakin nan da sace-sacen waya har ma da illata mutane.

Shugaban kungiyar Kwamared Muhammad Sa’id Abdullahi ne ya bayyana haka a yayin taron da kungiyar ta gudanar a Makarantar Ammar Bn Yasser Al-Islamiyya dake Unguwar.

Shugaban ya kuma ce wajibi ne mawadatan yankin su tallafawa matasan da kayan aiki da sauran bukatunsu don kare rayuka da dukiyoyin al’umma.

A ‘yan kwanakin nan Unguwar na fama da matsalar barayi masu sace-sacen waya, inda ko a makon jiya sai da barayin suka hallaka wani matashi a unguwar.