Za mu toshe Layukan dogo na tashoshin jiragen kasa a Kano – KARMA

Gwamnatin jihar kano ta ce za ta gyara tituna goma sha shida a wasu sassan jihar, baya ga toshe wasu daga cikin layukan dogo wandanda mahada ce da wasu titunan.

Shugaban hukumar kula da gyaran titunan jihar Kano KARMA Injiniya Idris Wada Sale ne ya bayyana hakan, ta cikin shirin ’’Barka da hantsi’’ na nan tashar freedom radio, wanda ya maida da hankali kan halin da wasu titunan jihar Kano ke ciki.

Idris Wada Sale ya kara da cewa, al’umma na taka rawa wajen lalacewar tituna ta hanyar zuba shara a magudanan ruwa wanda hakan ke sanadin lalacewar titinan.

Wada Idris ya kuma ce, manyan motoci na taka rawa wajen kara lalata titunan a sassan jihar Kano.

Shugaban hukumar ya bukaci al’umma da su bada hadin kai a duk lokacin da ma’aikatan gyaran titin suke gudanar da ayyuka su.