Ƙungiyar Likitoci masu neman Ƙwarewa ta yi barazanar shiga yajin aiki

Ƙungiyar Likitocin  masu neman Ƙwarewa a kasar nan, ta bai wa Gwamnatin Tarayya wa’adin mako biyu ta biya buƙatunsu da suka shafi walwala da kuma ci gaban aikinsu, ko kuma su ɗauki matakin fara yajin aiki.

Ƙungiyar ta bayyana hakan ne a yayin taronta na shekara-shekara karo na 46 da aka gudanar a jiya Lahadi a birnin Calabar, jihar Cross River, inda ta nuna damuwa kan jinkirin aiwatar da yarjejeniyoyin da ta cimma da gwamnatin tarayya.

NARD ta ce buƙatunta sun haɗa da ƙarin albashi da alawus-alawus, inganta damar samun karin girma a aiki, rage yawan aiki da ya wuce kima, da kuma ɗaukar ƙarin ma’aikatan lafiya domin rage ƙarancin likitoci a asibitoci.

Haka kuma, ƙungiyar ta buƙaci a biya likitocin kuɗin ƙarin aikin da suke yi sakamakon ƙarancin ma’aikata, tare da ɗaukar matakan kare ma’aikatan lafiya daga hare-hare da kuma magance ƙaurar likitoci zuwa ƙasashen waje.

AMGD