Uwar jam’iyyar PDP ta yi magana bayan korar Kwankwaso

Uwar jam’iyyar PDP ta ƙasa ta amince da shugabancin jam’iyyar a Kano na tsagin tsohon gwamna Kwankwaso.

Hakan na cikin sanarwar da mai magana da yawun jam’iyyar na ƙasa Kola Ologbondiyan ya fitar.

A cikin sanarwar ya ce, kwamitin ayyuka na jam’iyyar shi ne ya sanya idanu kan zaɓen shugabannin jam’iyyar da aka yi a ranar Asabar wanda tsagin Kwankwaso ya samu kafa shugabanci.

A cewarsa, Shehu Wada Sagagi da sauran shugabanni da aka zaɓa lokaci guda, su ne halastattun shugabannin jam’iyyar a Kano, wanda za su shafe shekara huɗu a kan mulki.

Karin labarai:

Siyasar Kano: Dalilan korar Kwankwaso daga PDP

Siyasar Kano: An ja layi tsakanin Sha’aban da Ganduje

Hakan dai ya biyo bayan zaɓen da tsagin Aminu Wali suka yi a ranar Alhamis inda suka zaɓi sabon shugabanci ƙarƙashin Muhamminna Baƙo Lamiɗo.

Bayan nan kuma suka sanar da korar tsohon gwamna Kwankwaso.

Dama dai tun a Alhamis ɗin tsagin Kwankwaso su ka yi watsi da batun korar ta bakin mai magana da yawun jam’iyyar na Kano Bashir Sanata.