AFCON 2021: Kasashe 17 Da Za Su Samu Tikitin Gasar

Najeriya ta zamo kasa ta 17 cikin kasashen da zasu samu tikitin zuwa gasar cin kofin Afirka na 2021.

Wannan na zuwa ne bayan da Najeriya ta doke Benin da ci daya mai banhaushi a fafatawarsu ta ranar Asabar 27 ga watan Maris 2021.

Yanzu haka dai Najeriya nada maki 11 sai Benin Republic da take da 7 sai kuma Sierra Leone tana da maki 4 yayin da Lesotho ke da maki 3 inda kuma suke dakon wasan karshe da za a fafata a ranar Talata 30 ga watan Maris.

Najeriya zata karbi bakuncin Lesotho a jihar Lagos, yayin da ita kuma Sierra Leone zata barje gumi da Benin a Freetown.

Kasashen 17 sun hadar da: Aljeria da Burkina Faso da Cameroon da Comoros da Masar da Equatorial Guinea da Gabon da Gambia da Ghana da Guinea da Ivory Coast da Mali da Morocco da Nigeria da Senegal da Tunisia da kuma Zimbabwe.