Ahmed Musa zai taimaka wa Pillars lashe kofin bana – Ganduje

Gwamnan Kano Dakta Anbdullahi Umar Ganduje, ya ƙaddamar da kyaftin ɗin tawagar Super Eagles ta Najeriya, Ahmad Musa a matsayin sabon ɗan wasan tawagar Kano Pillars.

A wani ƙwarya-ƙwaryar taro na masu ruwa da tsaki a harkar ƙwallon ƙafa da wasanni, da ya gudana ranar Jumu’a a fadar Gwamnatin jihar, gwamna Ganduje ya gabatar da ɗan wasan biyo bayan amincewa da ɗan wasan ya yi tare da saka hannu kan kwantiragin wakiltar tawagar zuwa ƙarshen gasar kakar Firimiya ta Najeriya NPFL 2021.

“Babu shakka dawowar ka zuwa Kano Pillars ya nuna ƙaunar ka da kishin ka a kan ƙungiyar da kuma tuna baya da ka yi”.

“Kai sananne a duniya gaba ɗaya, tabbas mun yi babban kamu, zamu ci gaba da taimakawa tawagar, kai ma muna fatan zaka taimaka wajen ganin ƙungiyar ta lashe kofi na Najeriya nan gida Kano “ inji gwamna Ganduje.

Daga cikin waɗanda suka karɓi dan wasan tare da taimakawa gwamnan wajen ƙaddamar da ɗan wasan, akwai shugaban hukumar wasanni ta jihar Kano Alhaji Ibrahim Galadima.

Sai Kwamishinan Wasanni Kabiru Ado Lakwaya da Mataimakin Gwamna Nasiru Yusuf Gawuna da shugaban ƙungiyar Kano Pillars, Alhaji Shu’aibu Surajo Yahaya Jambul.