Akwai barazanar kamuwa da cutar sukari saboda rashin wasu sinadarai – Likita

Daga Safarau Tijjani Adam

Farfesa Ibrahim Danjummai ya ce rashin samun wasu sinadarai a jikin mutum na taka muhimmiyar rawa wajen haddasa ciwon suga a jikin dan adam.

Kwararren likita a sashen kula da masu ciwon suga wato Diabetes da ke asibitin koyarwa na Aminu Kano ne ya bayyana ta cikin shirin “Barka da Hantsi” na nan Freedom Radio.

Ya ce ko wane mutum zai iya kamuwa da ciwon suga, musamman yadda a yanzu ciwon ke kama kananan yara.

Farfesa Ibrahim Danjummai na yin wannan jawabi ne a wani bangare na bikin ranar masu fama da ciwo suga ta duniya.

Ita kuwa jami’ar jinya a asibitn koyarwa na Aminu Kano Hajiya Hauwa Ibrahim ta ce rashin motsa jiki na taka muhimmiyar rawa wajen kawo ciwon suga.

Jami’an biyu sun shawarci jama’a da su rinka zuwa asibiti ana duba lafiyarsu a ko da yaushe domin sanin matakin lafiyarsu.