An ji ƙarar fashewa a babban birnin Saudiyya

An samu rahotannin jin ƙarar fashewa a babban birnin Saudiyya, Riyadh.

Wannan na zuwa ne bayan da hukumomin Saudiyya suka sanar da cewa za a dawo da zirga-zirgar jiragen sama a Filin Jirgin Sama na Ƙasa da Ƙasa na Sarki Khalid daga jiya Lahadi.

An rufe filin jirgin na Sarki Khalid na tsawon makonni biyu bayan jerin hare-haren da mayakan Houthi suka kai akai-akai.

Shafin Flightradar, wanda ke bibiyar zirga-zirgar jiragen sama a duniya, ya kuma ruwaito cewa wani jirgin sama ya tashi daga filin jirgin a farkon sa’o’in jiya.

Hukumar Saudiyya ba ta bayyana musabbabin sabon fashewar da aka ji a babban birnin ba.

Saudiyya, wadda ke jagorantar kawancen soji da ke yaƙi da Houthi, ta ci gaba da kai hare-hare kan yankunan da ƙungiyar ke iko da su a cikin makonnin baya-bayan nan.