An tsare fitacciyar ‘yar TikTok kan mutuwar saurayinta a Kano

Rundunar ‘Yan Sandan Jihar Kano ta tsare fitacciyar ‘yar TikTok, Fati Cele, bayan rasuwar saurayinta, Isma’il Makaye, a gidanta da ke unguwar Danbare a Kano.

Kakakin rundunar, CSP Abdullahi Haruna, ya tabbatar da faruwar lamarin, yana mai cewa ana ci gaba da gudanar da bincike domin gano hakikanin abin da ya janyo mutuwar.

Wata majiya ta bayyana cewa Fati Cele ta tada ƙarar neman taimako tana ikirarin cewa gobara ta tashi a gidanta, lamarin da ya sa aka kai Makaye Asibitin Nassarawa domin jinya, amma daga bisani ya rasu. Bayan faruwar lamarin, jami’an ‘yan sanda daga sashen Dorayi Babba suka tsare ta domin bincike, yayin da aka yi jana’izar marigayin, wanda ɗan kasuwar kayan kwalliya ne, bayan an miƙa gawarsa ga iyalansa.