Baɗala: An cafke babban jami’in Hisbah da matar aure a Otel

Rundunar ƴan sandan jihar Kano ta cafke babban jami’in hukumar Hisbah ta jihar Kano mai kula da kamen almajirai da mata masu zaman kansu.

An cafke babban jami’in ne a wani Hotel da ke unguwar Sabon Gari tare da wata matar aure a nan Kano.

Babban Kwamandan hukumar Hisbah na jiha Malam Muhammad Haruna Ibn Sina ya tabbatar da faruwar lamarin, inda ya ce tuni suka kafa kwamiti na mutum biyar domin yin bincike.

Ibn Sina ya bayyana takaicinsa kan faruwar lamarin, har ma ya ce, Kwamitin da aka kafa zai yi aiki cikin kwanaki uku sannan ya bada rahoton sa a kai, domin ɗaukar matakin da ya dace.

Rahotonni sun ce, mijin matar ne ya yi ƙorafi ga ƴan sanda, wanda su kuma suka bi sahu har suka cafke wanda ake zargin.

Karin labarai:

Mun karbi korafe-korafe fiye da kowanne lokaci daga farkon shekara nan – Hisbah

Kano: Hisbah ta yi sulhu da masu gidajen kallo da wuraren shaƙatawa