Bamu gayyaci Shatou Garko da iyayenta ba – Hisbah

Hukumar Hisbah ta jihar Kano ta musanta rahoton cewa ta gayyaci Sarauniyar Kyau Shatou Garko da iyayenta.

Babban Daraktan Hukumar Dr. Aliyu Musa Aliyu Kibiya ne ya bayyana hakan ga Freedom Radio.

Yace, ba su gayyaci Shatou da iyayenta ba, tambaya ce kawai aka yiwa Kwamandan hukumar Malam Haruna Ibn Sina shi kuma ya yi nasiha.

Babu wani umarni da muka bayar na a gayyato ta ko iyayenta, labari ne na ƙanzon kurege, a cewarsa.

Hisbah ta yi nasiha ne kan bayyana tsiraici wanda haramun ne.

A makon da ya gabata ne aka zaɓi Shatou Garko a matsayin sarauniyar kyau a wani taro da aka yi a birnin Legas.

Sai dai wannan zaɓe ya samu martani daga al’umma kasancewar ita ce ƴar Kano ta farko da ta taɓa samun wannan matsayi.