Buhari ya jinjinawa sojojin da ke yaki da boko haram

Shugaban kasa Muhammadu Buhari ya yabawa dakarun operation lafiya dole da ke aikin samar da tsaro a yankin arewa maso gabashin kasar nan.

Muhammadu Buhari wanda ministan tsaro manjo janar Bashir Salihi Magashi mai ritaya ya wakilta, ya bayyana hakan ne yayin wata ziyara da ya kai shalkwatar dakarun operation lafiya dole da ke garin Maiduguri a jihar Borno.

Muhammadu Buhari ya kuma ce, ba ko shakka dakarun na operation lafiya dole suna iya kokarinsu wajen ganin sun kakkabe ‘yan ta’addar boko haram a fadin kasar nan.

Inda ya shaidawa sojojin da suka jikkata a bakin daga da kuma iyalan wadanda suka rasa rayukansu da cewa, gwamnati za ta ci gaba da kula da halin da suke ciki don rage musu radadin halin da suka shiga sakamakon sadaukar da rayukansu wajen kare rayuka da dukiyoyin al’ummar NAJERIYA.