Covid-19: Gwamnatin Kano ta bada umarnin rufe makarantun Allo dana Islamiyya

Gwamnatin jihar Kano ta bada umarnin rufe dukkan Tsangayun karatun alkur’ani da makarantun Islamiyya dake fadin jihar don kaucewa annobar Coronavirus.

Shugaban hukumar Tsangayu da makarantun allo ta jihar Kano Gwani Yahuza Dan Zarga ne ya bayyana hakan kamar yadda jaridar Solacebase ta rawaito.

Gwani Dan Zarga ya ce za a rufe makarantun daga ranar Litinin 23 ga watan Maris da muke ciki, kuma hakan ya biyo bayan cimma matsayar da gwamnonin arewa maso yammacin kasar nan su kayi ta rufe dukkan makarantu a yankin.

Idan baku manta ba, a ranar Alhamis ne gwamnonin jihohin Arewa maso yammacin kasar nan suka amince a rufe makarantun yankin domin takaita cudanyar jama’a da dama, wanda hakan ka iya taka rawa wajen yaduwar cutar Coronavirus.

Karin labarai:

Covid-19: An fara rufe makarantun Islamiyya a Kano

Covid-19: An dakatar da kwallon kafa a Kano saboda Coronavirus