Covid-19: Mutum na farko ya rasu sakamakon Coronavirus a Kano

Ma’aikatar lafiya ta jihar Kano ta ce mutum na farko mai dauke da cutar Coronavirus ya rasu a jihar.

Cikin wata sanarwa da ma’aikatar ta wallafa a shafinta na Twitter da misalin karfe 11:55 na dare ta ce mutum na farko mai dauke da cutar Corona ya rasu.

Sanarwar ta kara da cewa an samu karin wadanda sakamakon gwajinsu ya nuna cewa suna dauke da kwayar cutar ta Coronavirus.

Izuwa yanzu hukumar tace mutane 21 ne ke dauke da cutar a jihar Kano.

Wannan na zuwa ne yayin da gwamnatin jihar ta sanya dokar zaman gida ga al’ummar jihar domin dakile yaduwar cutar daga daren ranar Alhamis.