Dole a ceto dalibai da malamai da aka sace a Oyo – Kwankwaso

Tsohon gwamnan Kano Rabiu Musa Kwankwaso ya bayyana damuwarsa matuƙa kan halin da dalibai da malamai da aka sace daga makarantu a karamar hukumar Oriire da ke jihar Oyo ke ciki.

Ya bukaci gwamnatin Nijeriya da ta dauki batun ceton su a matsayin abin gaggawa, tare da ɗaukar tsauraran matakan da za su hana irin waɗannan hare-hare da sace-sace sake faruwa a nan gaba.

A cewarsa, wajibi ne Nijeriya ta kuɓuta daga matsalar rashin tsaro da ke addabar ƙasar, yana mai jaddada cewa kare rayuka da mutuncin kowane ɗan ƙasa ya zama babban nauyi ga gwamnati.