Emefiele ya isa gida bayan shafe kwanaki 151 a hannun jami’an tsaro

Tsohon gwamnan babban bankin Nijeriya CBN, Mista Godwin Emefiele, ya isa gidansa da ke birnin tarayya Abuja, bayan da wata babbar kotun Abuja ta bayar da belinsa.

Emefiele ya shafe kwanaki 151 a hannun jami’an tsaro.

Babbar kotun tarayyar da ke zamanta a yankin Maitama ta bayar da umarnin a sake shi daga gidan yari, duk da rashin amincewar da babban lauyan gwamnatin tarayya, da hukumar yaki da cin-hanci da rashawa EFCC suka yi.

A hukuncin da mai shari’a Olukayode Adeniyi ya yanke, ta bayar da umarnin a saki tsohon gwamnan babban bankin ga lauyoyinsa, duk da cewa ta umarce shi da ya miƙa dukkan takardun tafiye-tafiyen sa na kasashen waje.