Faifan bidiyon dala: Ba harka ta bace, ba ruwa na – Shugaban majalisar dokokin Kano.

Shugaban majalisar dokokin jihar Kano Injiniya Hamisu Ibrahim Chidari ya ce, batun bincike ko kalaman da gwamnan Kano Dr Abdullahi Umar Ganduje ya yi abaya-bayan kan faifan bidiyon dala wanda a shekarun baya aka yi zargin an ganshi yana karbar na goro a wajen ‘yan kwangila bai shafeshi ba.

A cewar Hamisu Ibrahim Chidari shi bashi da ta cewa kan wannan al’amari.

Injiniya Hamisu Ibrahim Chidari ya bayyana hakan ne jim kadan bayan kammala shirin ‘barka da hantsi’ na tashar freedom radio da ya gudana a ranar laraba.

Da aka tambaye shi cewa, a waccan lokaci majalisa ta ce za ta gudanar da bincike kan wannan batu, shin menene sakamakon binciken?

Sai ya ce ” to ai bibiya ya kamata ku yi a can aga meye karshen labarin, amma ni ba harka ta bace saboda haka bazan ce komai ba kan wannan al’amari.