FIFA ta fara gina filin wasa a jihar Kebbi

Gwamnatin jihar Kebbi ta jagoranci tawagar hukumar kwallon kafa ta kasa wajen kaddamar da fara ginin matsakacin filin wasan da hukumar kwallon kafa ta duniya FIFA ta dauki nauyin ginawa tare da goyon bayan hukumar kwallon kafa ta kasa NFF.

Gwamnan jihar ta Kebbi Abubakar Atiku Bagudu tare da mukarraban sa ne suka jagoranci wakilan tawagar shugaban hukumar NFF zuwa wajen da za’a gudanar da aikin a Birnin Kebbi.

Atiku Bagudu ya jinjina wa hukumar kwallon kafa ta duniya FIFA da kuma NFF bisa amincewa a gudanar da aikin gina filin wasan a jihar.

Haka kuma shugaban hukumar NFF Amaju Pinnick da Ibrahim Musa Gusau ya wakilta, ya ce, ya na taya daukacin mutanen jihar murnar samun tagomashin irin wannan aiki daga FIFA.